TeenAIDS PeerCorps

El "Dr. John" Chittick y TeenAIDS-PeerCorps

El Dr. John Chittick, direutor executivu de TeenAIDS-PeerCorps, caleya andariegu pelos cinco continentes col oxetu de facer llegar el mensaxe del VIH/SIDA xuvenil a los rapazos/rapaces del mundiu enteru. El so camín empobínalu per cais de ciudaes y caleyes d'aldees de 21 países estremaos al envís de formar a 25000 mayestros qu'aiden a los sos amigos y compatriotes. Pues siguir el so viaxe na nuesa páxina d'internet y ver y oyer conversaciones ente xóvenes sobro la prevención del SIDA n'otros llugares. El MIT (Massachusetts Institute of Technology) empobina les comunicaciones nel estranxeru col "Dr. John" y la world wide web (internet). El Dr. Chittick ye un Doctor d'Educación de la Universidá de Harvard esfotáu en llevar los fechos médicos del VIH/SIDA direutamente a los rapazos auquiera que vivan, trabayen, estudien, vaigan de vacaciones o viaxen. Elli predixo una nueva epidemia de rapazos/rapaces infestaos col VIH na so cabezalera obra d'investigación médica, "Adolescents and AIDS: The Third Wave" (Harvard University, 1993-94). ["Adolescentes y SIDA: la tercer fola"]

La epidemia de SIDA xuvenil xorrez perdayures

"Hai yá 19 años que tamos sumíos nesta epidemia global y del so enorme incrementu ye fiel reflexu'l númberu de rapazos/rapaces infestaos pol VIH. El problema ye que la mayoría los mozos nun saben que son VIH-positivos porque enxamás nun se-yos fixeron pruebes," diz Chittick. "Per otru llau, los adolescentes siéntense invencibles y paez-yos que nada nun ye a mancalos. Los rapazos cudien que nun son vulnerables a un problema d'adultos como'l SIDA, anque quieren comportase como adultos. Munchos rapazos cúntenme que caltienen rellaciones sexuales a edaes más tempranes y más davezu de lo que los estudios tienen suxerío. Por desgracia, munchos d'estos rapazos nun se decaten de que'l sexu ensin proteición ye peligrosu o de que compartir drugues usando aguyes pue tresmitir el VIH dende'l sangre d'otra persona. Tráxicamente, a munchos adolescentes nun-yos paez que'l SIDA pueda afeutalos a ellos o a los sos collacios."

Na Universidá de Harvard University onde Chittick entamó la so investigación in 1988 sobro cuestiones de educación de SIDA n'escueles y xuventú, elli dióse cuenta de qu'una nueva y más peligrosa epidemia de VIH/SIDA diba afeutar a los xóvenes, especialmente a los rapazos activos sexualmente y a los usuarios de droga que compartíen aguyes. Investigaciones recientes de UNAIDS y otros estudios importantes suxeren que tien llugar agora una epidemia de SIDA ente rapazos/rapaces: el 50% de tolos casos nuevos de VIH a lo llargo y ancho'l mundiu, dase ente mozos con edaes comprendíes ente los 10 y los 24 años. N'América , ún de cada cuatro nuevos casos de VIH dase en rapazos/rapaces ente los 13 y los 19 años. Hai diez años, los númberos yeren probablemente ún d'ente 10000. ¡Estos númberos son espantibles! Los crecimientos n'enfermedaes tresmitíes sexualmente (STDs) son incluso más grandes y davezu constitúin el camín pel que'l VIH entra nel sangre d'una persona.

Debío al deseyu de la xente xove d'alcontrar trabayos bien pagaos, meyores condiciones de vida, oportunidaes más grandes d'educación, o desafuegu de la guerra o la persecución política y relixosa, munchos mozos viaxen más que nunca. Los rapazos y los adultos xóvenes emigren dende arees rurales a les ciudaes y tamién a otros países. Conocen nuevos amigos y mantienen rellaciones sexuales con estos collacios. De resultes d'ello, desendólquense nueves y más fuertes races de VIH. Estes cada vegada más poderoses y peligroses formes de VIH y SIDA tresmítense a lo llargo'l globu nel mesmu tiempu que-y lleva a un aeroplanu esnalar.

"La verdá ye que nun hai cura! La única braera prevención ye la educación sobro'l SIDA," desplica Chittick , "y ésta tien que se sofitar en fechos médicos reales. Los adultos nun puen engañar a los rapazos/rapaces con mentires. Son demasiao cucios. Si-yos paez oportuno mantener rellaciones sexuales porque-yos presta, ye importante desplica-yos cómo mantener eses rellaciones sexuales de forma segura pa ellos."

Magar les práutiques de "sexu seguru" como los preservativos nun tán nun 100% garantizaes(los preservativos varien en calidá y unos pocos delles vegaes ruempen), Chittick diz-yos a los rapazos, "Si conocéis a dalgún amigu que tea manteniendo rellaciones sexuales o tomando drogues col usu d'aguyes, cuntái-yos la verdá sobre los peligros del SIDA. Si ellos entá escueyen mantener eses rellaciones sexuales, dicíi-yos que los preservativos son más seguros que'l sexu ensin proteición."

El Dr. Chittick pon l'acentu nel mensaxe de responsibilidá personal y educación per igual col envís de galguiar l'espardimientu del VIH/SIDA ente la xuventú. Elli encamienta tamién, "Los adultos qu'atalanten que los rapazos xóvenes nun caltienen rellaciones sexuales nun tán siendo realistes. Ye meyor preparar a los rapazos pa la presión qu'esiste na sociedá qu'inorar un problema creciente que quiciabes acabe segando tempranamente la vida de los sos fíos"

El SIDA xuvenil ye una realidá pa tolos adolescentes activos sexualmente. Ta aumentando en tolos países y en tolos continentes. Esti ye'l motivu pol que'l Dr. Chittick anda caleyando pa entrenar a la xente mozo a ser mayestros de prevención de SIDA pa los sos iguales..

PeerCorps: ¿Qué ye?

Podemos describir "Peer education" como un grupu de rapazos que deprenden a los sos amigos y compañeros coses rellacionaes cola prevención del SIDA. La mayoría los mozos afayen abegoso falar de sexu con adultos, pas y mayestros. Prefieren falar de detais íntimos d'amor y sexu con xente de la so mesma edá. El Dr. Chittick desendolcó les sos téuniques d'entrenamientu educacional na Universidá de Harvard. Elli llama al so programa, "PeerCorps" (Gabinete d'Iguales) porque ye similar al conceutu de "Peace Corps" (Gabinete de Paz) afitáu pol presidente de los EEXX John F. Kennedy qu'unvió xente mozo a tierres estranxeres pa ufiertar asistencia y educación. En cualquier casu, PeerCorps ye un programa voluntariu que nun ta empobináu pol gobiernu. El so oxetivu fonderu ye aidar a un grupu de rapazos xóvenes a esparder les anuncies sobro'l VIH y el SIDA pente la so xeneración – pa salvar les vides de familiares, collacios y vecinos.

La educación d'iguales volvióse crecientemente popular nel procesu de frenáu d'actividaes d'altu riesgu ente la mocedá. N'América y n'Europa, diseñáronse programes esponsorizaos por escueles col oxetu de detener la conducción so los efeutos del alcohol, l'abusu drogues y la violencia xuvenil. Davezu, estos mensaxes salieron airosos del so oxetivu de convencer a los xóvenes a evitar comportamientos arriesgaos y práutiques poco segures. Anque estos programes se diseñen pa dirixise a eventos "immediatos" na vida los rapazos-- non un problema como'l SIDA, nel que pasen munchos años enantes de que la infeición de VIH camude en SIDA. Como un neñu pue tener VIH y nun lo saber, la so inorancia plantega un peligru pergrave pa les sos pareyes sexuales. Ún nun pue "ver" el VIH, el virus, fasta que camuda en SIDA, la enfermedá. Asina que los esfuercios de prevención de SIDA deben usar el modelu PeerCorps si nun se convence a los rapazos/rapaces de qu'eviten conductes peligroses mentantu seyan sexualmente activos o fasta que se casen y se faigan monógamos. Esti ye'l motivu pol que'l sistema PeerCorps del Dr. Chittick funciona en estremaos llugares a lo llargo y ancho 'l mundiu.

Sabemos que los rapazos/rapaces prefieren falar sobro temes privaos y personales colos sos meyores amigos. Incluso esta mena discusiones plantega problemes nestes dómines de SIDA xuvenil porque munchos d'estos rapazos inoren los fechos médicos precisos sobro la tresmisión del VIH. Nun son médicos nin científicos. Anque puen deprender los fechos reales d'espertos como'l Dr. John y de los mayestros del PeerCorps. Como a bien d'adultos nun-yos presta falar sobre la sexualidá de los rapazos/rapaces, la xente más vieyo elixe davezu caltener silenciu, na esperanza de que los sos neños enxamás nun van oyer nin esperimentar col sexu .

Chittick alvierte, "El silenciu ye a matar. Nun queremos que la hestoria se repita. Si nun falamos del peligru del SIDA cola nuesa xuventú, darréu los tos fíos podríen coyer el VIH y morrer de SIDA. ¿Qué ye peor? ¿ Falar de los riesgos del sexu o ver a los rapazos y rapaces morrer por cuenta un virus que yera evitable? Los adultos tendríen que protexer a los sos xóvenes -- non facer el problema peor."

Quiciabes, el fautor simple más crucial na infeición de VIH/SIDA pola xuventú ye la presión de los otros mozos, que convencen a los sos amigos pa esperimentar col sexu y les drogues utilizando aguyes. Poques vegaes ta al algame d'un rapaz información médica precisa pa prevenir a los sos amigos sobro'l SIDA y sobro cómo utilizando preservativos se pue prevenir el VIH. El Dr. Chittick diz, "De mano, la xuventú ha ser alvertío sobro los peligros del SIDA; en segundu llugar, hai que-yos amosar los fechos médicos; per último, han ser autorizaos a llevar-yos el mensaxe a los sos familiares y amigos." Nesti sen, el mensaxe la prevención espárdese d'un amigu a otru y pue salvase una xeneración de rapazos/rapaces. Ye una idea cenciella, pero que funciona. Los métodos de deprendizaxe antiguos nun funcionen cuando los adultos sermonien a los mozos pa que nun seyan "malos" pero nun-yos dan la necesaria información pa qu'estos rapazos/rapaces puedan elixir protexese ellos mesmos. Los xóvenes tienen que conocer por qué ye mester evitar conductes peligroses y prauticar sexu "seguru".

Los mozos xóvenes dicen que-yos presta'l mou en qu'el Dr. John camina pente ellos y –yos fala d'un xeitu profesional y amigable al empar. Elli ye nidiu no que cinca a, "Non sexu = non SIDA. Non aguyes compartíes = non SIDA. Estos son fechos médicos. Pero si conoces a dalgún amigu qu'elixa sexu ensin proteición o aguyes compartíes, di-y la verdá, desplicándo-y cómo'l VIH se tresmite d'una persona a la so pareya y cómo evitar o a lo menos minimizar el riesgu. Ye la vuesa responsabilidá salvavos a vós mesmos y a los vuesos amigos."

Si se-y invita, el Dr. Chittick considerará la posibilidá d'allegase al to país pa falar del SIDA ente rapazos y preparar mayestros del PeerCorps. Tu pues aidar agora faciendo llegar la direición d'esta páxina Web a los tos amigos y a les escueles llocales. Tamién pues unviar entrugues per email al Dr. John y al so equipu de rapazos pa respuestes confidenciales sobro sexu, salir con daquién, usu de drogues y VIH/SIDA. Arriendes d'ello, pues baxate (download) de baldre cualquier cosa qu'heba nesti llugar de la rede. Por favor, áidanos y a los tos amigos vertiendo esta información a la to propia llingua. ¿Quiciabes tienes dalguna hestoria que nos cuntar? Necesitamos la traducción al inglés y la to propia copia p'allugala n'Internet.

El Dr. John Chittick ta n'actualidá trabayando per 21 países del mundiu nel llabor d'educar a los rapazos/rapaces. Pues siguir esti guacéu calcando equí. Gracies y sé siempre seguru y cuciu.